محمد وسمي العجيان
14-09-2010, 11:38 PM
بسم الله الرحمن الرحيم
قصيدة الشاعر والراوي المعروف فواز فهد الغسلان الشمري
التي صنّف فيها 100 رواية من علوم الطيب والمرجلة عند قبائل الجزيرة العربية
فواز ابن غسلان يهدي سلامه
والحمدلله هي بداية كلامه
نرجيه يرحمنا بيوم القيامه
في ساعة ماينفع المال والجاه
قلبه يروم الباديه والبداوه
والناس في ميزان حكمه تساوه
ويشهد لمن حاز الصخى والنقاوه
واللي زعل من قولنا مااترضاه
ان كان يزعل عند قول الحقيقه
محدن قدر يرضي جميع الخليقه
وحطيت لأهل العرف عندي وثيقه
من شان كل الناس تاثق وتقراه
اليوم بعض الناس صارت ذيابه
تبني بيوتن كان ساسه خرابه
واللي يريده يكتبه في كتابه
ويطبع كتابه بالسنه عشر طبعاه
وانا نويت اكتب حروفن نقيته
بالحفظ واسفاره تعبت وشريته
وعندي دليل اللي جزمت و رويته
ودرب الخطأ لازم بالاقدام ناطاه
ناطى الخطأ لكننا ما نعيده
ولاطعت شيخن طامعن في رصيده
واللي كذب بالقول غصبن نصيده
ولو يشتمن وسط العرب ماشتمناه
واذا ثبت لي غير ماكنت راوي
راح اعترف دامي للإصلاح قاوي
ولاني على ذكر الخطايا قصاوي
والناس محدن سالمن من حكاياه
ولا اقول محدن يفهم الصدق غيري
وابقى بوسط اهل المعارف صغيري
والعلم مثل الموج شربه عسيري
ونرجي ولي العرش رب البرياه
اذكر روايات علومه شهيره
صارت لمن عاشوا بوسط الجزيره
وما اقول انا ماصار بالطيب غيره
لكن ذكرت اللي سمعنا وقلناه
الطيب واجد غير ماصار معنا
وحبيت اعد اللي بصدقه سمعنا
وهذا الذي لأهل المكارم جمعنا
والصدق ياصلنا ولو ماوصلناه
أروي رواياتن ثقاتن شهوده
أعطت على صدق الروايه عهوده
ولا نظلم أجواد العرب في لحوده
قوم عطونا ثم قومن عطيناه
وعندي لها قلبن فهيمن وحافظ
ولسان مع صدقه فصيح الملافظ
وعقلن لكذب أهل الفراغات رافظ
وكله من اللي كان ضقنا دعيناه
وبعض العرب مقبول للناس قوله
وسارت قلوب السامعين بقبوله
والكايده يلقى طوارف حلوله
ولا يكسبه رجلن على الكذب مركاه
واللي روى علمن ولا احدن درى به
علمن كبيرن مثل شامخ هضابه
نقول يا أهل العرف من وين جابه
كيف اختفى دامه مثل ظلع اباناه
وكتابة التاريخ ماهي فزايع
ولا فيه فرقن بين شابع وجايع
ولا فيه غاراتن وكسب وقلايع
والظلم يورث داخل القلب حسراه
ونويت أرتبها على الطيب ترتيب
أقوى المواقف وأفضل الناس بالطيب
مواقفن من دون شكن ولا ريب
وجميعهم بالطيب حاشوا مزاياه
هذا وتفضيلي لنفس الفعيله
ماهو لنفس الشخص والا القبيله
كم واحدن حاز الندى والفضيله
ورقى جبال المجد لو ماذكرناه
وأبعدت فيها عن علوم الحرايب
أو ذكر نقص الناس والا العايب
وذكرت فعل الطيب وقت النوايب
فيها لجيل اليوم حكمه وعبراه
وشاورت فيها كاسبين النفيله
اللي يشوفون المغالط فشيله
ولا همني كونه من ايا قبيله
يهمني صدق الروايه وذكراه
أعظم مفاخرها خذاه السويطي
صنيتان جرحه بالضماير محيطي
قلبه بلاهوب الوفى يستشيطي
ابنه على جاره تقدم وذكاه
والثانيه طيبه خذاه السبيعي
اللي فعل له فعل ماهو طبيعي
لأجل المهادي والشرف لايضيعي
مفرج شلع راس الولد ثم درباه
والثالثه عمران ولد البجيدي
أدخل دخيله عن سيوف العنيدي
وهو يطلبه دم الولد ياعضيدي
عسى ولي العرش بالطيب يجزاه
والرابعه طيبه لصبر المهادي
مع جاره اللي في ردى البنت زادي
وقال اصبري والصبر درب السدادي
وصبر ثمان سنين والظيم ياطاه
والخامسه شيلة خويّن كسيري
اسبوعين ماهابوا طريقن عسيري
وفازوا بها الشلقان عقب المسيري
وكسيرهم في زين الأشعار جازاه
والسادسه للي بقرن الشمالي
أدخل عن الأتراك من كان جالي
والترك جيشه مثل وبل الخيالي
وابن سمير اعلن مواقف حمياه
والسابعه شاله حمد ولد عيده
نخاه مربوطن شكى نار قيده
وصار الثمن في كل ماحاشت ايده
من قوم ابن مرشد عسى الخير ملفاه
والثامن اللي قدم الطفل نايف
للذبح عن جارن حريمه ضعايف
سليمان قال الطفل نلقى خلايف
وبني عطيه طيبهم طال مبناه
والتاسعه طيبه لشيخ الظفيري
اللي حمى ماجد بسيفن شطيري
راع البويت اللي مقامه عطيري
دغيم ثنى دونه عن القوم وأنجاه
والعشر ابالظلعان يرجي خويه
كسير طاح بسهلة جرهديه
ربعه تميم أهل العزوم القويه
شهرين لين الله من الكسر شافاه
حادي عشر للي عطى الشاة ذيبه
ذيبن كبيرن والدغيري رضي به
ابن سعيّد شاع بالناس طيبه
يوم العرب بالجوع تبلش بدنياه
ثاني عشر للي بليله يصيحي
للي وقع من جوع بطنه طريحي
يوم المجاعه والزمان الشحيحي
ابن مهيد اللي على الطيب ناداه
ثالث عشر للعوهلي مع جريحه
تسعين يوم وكل يوم ذبيحه
ربعه عتيبه والصخى فاح ريحه
وهذي سلوم المرجله يالقراباه
رابع عشر طيبه لشيخ الشرارت
اللي هوادي ضيفته روس خلفات
خلف رمى في مجحم النار طاقات
وأكمل عشى ضيفه ولا قال حيفاه
وعقبه مشى من شان عشق الرويلي
محسن طواه العشق وأمسى ذليلي
ونخى خلف راع المقام الجليلي
ومشى لعينه بس ربي توفاه
خامس عشر للذيب والطيب فاله
من نقوة العجمان وأهل الجماله
ومن طاب طيبه ياصله من خواله
ماخاف تهديد المهندس وفرقاه
سادس عشر للي نقض سقف بيته
حمد كريمن في بلي ذاع صيته
يوقد عشى ضيفه وفعله رويته
وعقبه وقع بيته ولاجاب طرياه
سابع عشر للي قعد مع خصيمه
عقيل والمجدور من دون خيمه
عقب العداوه صار خصمه نديمه
صعبن ولد عمه يذوق المهوناه
ثامن عشر للي عرف حق جاره
واسقى الغنم من در غالي بكاره
هجرس من التومان والطيب كاره
ساق الغنم والناس تمشي بممشاه
تاسع عشر والجار شالوا شياهه
فوق الخيول وجارهم بان جاهه
والحرب ماتمنع رجال الوجاهه
مطارفة وايل على الطيب منشاه
وعشرين شيخن مات من صوت ناخيه
فايز مع ابن سويط والضيم كاويه
وياغيبة ابن هذيل بالحال تنهيه
وعقوب من غيضه على القبر خاواه
واحد وعشرين ابن ناحل وطاريه
لو ماكسب يعطي ضعيفه ويحذيه
شيخن ولايترك طريقن مشى فيه
واشعار ابوماجد بالامداح تلقاه
واثنين والعشرين من شان جربوع
من ملحته ذود المعادين مرجوع
وهي لقمتن ماتطرد الضعف والجوع
معروف بسبيع العزيزه حلاياه
وثلاث والعشرين راع العطيه
لنهيت ولد بريك ماله جزيه
شيخ الظفير اللي كفوفه نديه
لصديق ابوه اللي من الضيم ينخاه
واربع مع العشرين يرقى سنوده
وعن غرة الجارات يلزم حدوده
يقول مثل اللي رضعنا ديوده
طيبه لابن هذال والمدح يزهاه
والخمس والعشرين راع المسيره
صوب الكويت اللي دروبه عسيره
عجوز تبي التمر ياصل صغيره
وطيب الصعيدي راف به ثم وداه
خمسه مع العشرين فازت ربوعه
وجبته على الترتيب في كل روعه
واللي يجي بالطيب في مثل نوعه
ومن دون ترتيبن ابي اذكر حلاياه
وان طبت ياراسي كسيتك عمامه
لابن سرار اللي شهيرن كلامه
وهو من بني شهران رمز الشهامه
وابنه عمرو جاء من خواله وداواه
واللي حلف بالله من شان حصه
ولعيون حصه حالفن ماتمصه
هذا الدريعي كان ودك تنصه
الشيخ ابن شعلان سارت سراياه
واللي من الجربان قاد المسيره
خمسين ذيبن من حدود الجزيره
وخذى بثار اللي وقع وسط بيره
هايس ولا هاب السباع المضراه
واللي قعد بالدار عقب الجماعه
اللي مشوا والحرب يوضي شعاعه
ابن عقيل اللي خذته البتاعه
من نقوة السرحان صالا شظاياه
واللي كفل بالطيب رمل القبيله
وعشاء الأرامل كافله كل ليله
ابالرمل سالم فعـوله جميله
من روس شيخان الكرام الطوالاه
والله ستر بالطيب عرض المعازيب
ودهن كفوفه سمن من كثرة الطيب
ما حط بكتوف المعزب كلاليب
المرتعد ومطير بالطيب كافاه
واللي طرد ذوده قبل يارد البير
كله لاجل يسقي ركاب المسايير
سواه ابن طارش خوي المناعير
وطاح العشار من الذي طاب في ماه
وبمطير سواه ابن هدباء عياني
مع العتيبي في قديم الزماني
ولا واعذابي كان جاري حداني
قاله سمير وراعي البير بداه
واللي حمس واحرق خياش القهاوي
ابن لحيدان التميمي شفاوي
يوم الدهر يمنع ردي الهقاوي
منتوج صنعاء جابه الشيخ واغلاه
واللي نقد فنجال شيخن خطيري
من يوم ذاقه قال هذا دميري
هرجه رفع بالحيل ضغط الاميري
وابن ظويهر صار صادق وراعاه
وشيخن سمع نخوا رفيق الشليمي
يبي النياق اللي تقل جول ريمي
ماخوذ ينخى له شجاعن كريمي
وعبدالكريم اقبل على الذود واعطاه
مثل القريفه قال وين الحميا
ومطير ربعه شاع طيبه بليا
والطيب للي راقدن ماتهيا
وراع الصخى ربي يعينه بمسعاه
وصعبن على اللي مايعرف العطاوي
شليويح ويلك كان صاحت مضاوي
بالسلم قلبه للعـذارى هـواوي
وبالحرب ويل اللي على الخيل لاقاه
وراكان ابن حثلين فوق الحصاني
اعطى رجال الترك درس ومعاني
ولا يشرب القفوات كود الهداني
يطرد بها اللي خانته عقب فرقاه
وصوارم الهيلا فعوله صعيبه
ردو نياقن عقب ماهي نهيبه
حيثه حلب في راس تركي حليبه
شيخن صواريم الرجاجيل تنصاه
واللي بحايل شاخ فيها وطابي
وسموه بالشدات سمن العرابي
محمد الطيب كريم المرابي
ابن علي ستر الهنوف المحناه
ايضا الكريم اللي بوسط الجلاعيد
له مجلسن من جاه كنه ضحى العيد
الدهمشي فوقي سميراء تقل حيد
الحب صاعن والرطب كان وزناه
وابن مغامس جاب تمرة جنينه
والجوع وسط الكبد مثل المكينه
وشاهد طريح الجوع ظاهر ونينه
واعطاه تمر الطفل والرب كافاه
واللي دفع مدى العرب لاهل جاره
اللي توفى عقب طيحة جداره
ساق الديه في طيبته واختياره
عند الدواسر بالروايه خبرناه
واللي قبال البيت مثل النثيله
مخلوطتن مابين بنّه وهيله
حتى المعادي قال حربه فشيله
شيخ المناقر من بلي طيب الجاه
وابن لهيلم وقفته لابن غسلان
اعطاه شاة الضيف لو كان زعلان
قال اسكتوا عن راعي الطيب يافلان
لولاه ضايق ما تقدم على الشاه
وزيد العجاجي عقب طيب التميمي
اللي جميله بالزمان القديمي
انجى حلاله من قرار الخصيمي
وعادت جفيفاء عقب الامحال واحياه
واللي يهلي بالبقر وسط ليله
يظنها ضيفن رمى الجوع حيله
ابن فزير اللي مثل وبل سيله
من مزنة(ن) بالوسم سالت شغاياه
واللي بني لاجل الكرم حوطتيني
لاجل الضيوف اللي يسار ويميني
بالمستجده والكرامه تبيني
ابن ربيعان التميمي تبناه
واللي صبر قدام ضيم القرايب
وماتوا عياله من عطيب الضرايب
واخوه راح وصابرن للمصايب
جديع بن قبلان والعفن يفداه
واللي نقل بالطيب بعض الحجيجي
اللي ركايبهم غدى له هجيجي
وساروا حفايا تحت ريح وعجيجي
واولاد الازمل والركايب عطاياه
واللي ختم زين القوافي بيائي
اللي خيوله جاهزه للندائي
اعاد ذوده مع حلول المسائي
الغيهبان ومرة الطيب مرباه
واللي يقيم اسبوع في مدخل الشيخ
من شان رجلن من رجالن مطانيخ
وحمى ظويهر عن سيوف المناويخ
هذا عبكلي شيخنا في حمياه
والشايب اللي ماتحلل عظامه
الشيخ ابن هادي عزيزن مقامه
في مجد قحطان العزيزه علامه
اقفى على بيض الفعايل وخلاه
واللي عطى وصفه لكل القبايل
اللي حمى بيض النعام الطوايل
شيخ العريعـر من رفاع الحمايل
مع ماجد اللي يطلب العفو باتلاه
واللي نخى عدوان شيخ الطواله
يبي الكفيل اللي عليه الكفاله
وعاقب منيع وشال كامل حلاله
وسدد بريك اللي بالاشعار ينخاه
ومقرود ربعه مع شهير المغازي
ساجر فقد طيرن يروم بالنوازي
وحتى السلوقي راح ساقه قزازي
وصبر على جارن بقرده تبلاه
واللي من الاخوان طاع الكبيري
لو يضربه زعلان طيبه كثيري
ومن ضربته طاح العصا بالمسيري
وميزر خذاه وقام للاخو واعطاه
وهذا الفديع اللي فعل مثل فعله
مع شالح اللي طيب ربعه جمع له
خادم لاخوه وخاط ثوبه ونعله
وشالح قبل موته بالاشعار ينعاه
والا فحيمان الحجوري حمى زيد
وخلاه يكمل حج فرضه ضحى العيد
فك السجين اللي بسجنه شكى القيد
ربعه جهينه بالملازيم منصاه
واللي مشى فزاع من شان عيده
اللي عطوها شايبن ماتريده
واللي نخت ضاري تلاقي عضيده
والشهم اخو صلفه مشى من حمياه
واللي من عياله شكى نار الاتعاس
ودعى عليهم دعوة تجلب الباس
ومن دعوته طاحوا بقطاع الارماس
وجحيش سارت بين الاقوام شكواه
واللي ينام بجنب بنتن عنيده
شهرين والطاهر يظنه وليده
مع انها بالنوم ماهي بعيده
ولد المفضل ماكشف عن خزاياه
واللي عطى بيته لجارن ضعيفي
وعانوه ربعه بالحلال الكليفي
سواه ابن جامع وسيع المضيفي
شيخ العوازم والصخى من مزاياه
واللي عفى عن واحدن جاه حايف
يومه زبن قبرن لشيخ الطوايف
قبر الصييفي عقب ماكان خايف
وسبيع ماتوذي دخيله لـذكراه
واللي حرق من رحمته دفتر الدين
للي هرب من خوف سجن السلاطين
الطوب سواها وعندي براهين
وشعر العبيكه للشهاده حفظناه
واللي حمى النسوان عن نقرة الضيق
من نقرة المشهد على فكة الريق
اربع بناتن في وصوف الغرانيق
وسليمان بن حتروش بالطيب سواه
واللي عن الجاره عفيف اللساني
وقامت تحاول به وهو مايداني
اقصد به الطاهر جريس اليماني
اللي رفض ياطى الخنى مع رزاياه
واللي لقى حتفه بمقتل بنيه
ومثله تموت المهرة الثابتيه
يوم العرب فيها الندى والحميه
ماتوا لموتة واحدن طال مبناه
واللي نجى من كيد رجلن غدر فيه
وعزي لمن مثلي ذلوله تخليه
وقعد لها باللي حديده مصفيه
وقطع فهد حبلن عليها نقل ماه
واللي حمى لاغلى الرفاقه حصانه
في حل لغزن للخلاوي ضمانه
هذا بريك الاسعدي في زمانه
وابن سويط اخبر خصيمه وخلاه
والا الصويغ غاب سبعة عوامي
ورجع يبي طفله وزين الوشامي
وساعة وصوله طاح بيته هدامي
وماتوا وقلبه جر حسره ولوعاه
واللي من الضيقه نخى قال يادباس
تركت زين الدرب وامشي مع الساس
ورجع له اللي يشبه الطير قرناس
واعاد للشايب مكانه ومركاه
ومثله عقاب الخيل كانك تقصيت
وسعدون شيخن قال ياعقاب ذليت
واذويت من كثر العناء واستخفيت
وذاق العواجي زين عيشه بدنياه
وبني تميم اللي تشيل البعيري
شاله هل الروضه بعزمن كبيري
بعير ضيفن طاح دونه ثبيري
وابوجري ضيفن بالامداح جازاه
واللي نخت ناسن على ذبح ذيبه
اللي كلت وسط الليالي حبيبه
ثلاثتن ساروا لها في شطيبه
واحد الثلاثه صادها عقب لقياه
واللي لمح دابن براس الشطيبي
ينزل عليه الطير ظنه عسيبي
دابن عمى قدام عين الذويبي
وزاد اتكاله في بديع السماواه
واللي رحل مع صغر سنه لبغداد
واصبح لاخوه بطيبة القلب كداد
ومن المرض ناصر ولد غيث ماعاد
واخوه عبدالله بالاشعار يرثاه
والا المتينه له حروفن كريمه
ارسل يدافع عن مكارم خصيمه
وراع الكرم يترك دروب الظليمه
وحامى عن اللي قال ياكليب ياناه
واللي ترك ظبي المفالي طليقه
ذكر وصاتن شالها من رفيقه
له في بني هاجر عروقن وثيقه
هذا الخلاوي مايخلي وصاياه
واللي حمى جاره بنار القوايل
اللي دخل من خوف سلطان حايل
وعاف البلد لاجله وشد الرحايل
الدوح مـن شيخـان عبـده ومجـلاه
واللي لابن خشمان ساق النجايب
حيثه ترك له مجلسه ياحبايب
زيد الخوير اللي فعوله عجايب
في مجلسن للشيخ في عيد الاضحاه
واللي مدح ناسن مثل باشة الروم
وياحمود يظهر لك صديقن من القوم
الاحمدي من حرب بالطيب معلوم
قافه سرى ذكره مع اقصاه وادناه
واللي رفض يشرب على جمة البير
قبل الرفاقه خوف بعض المعايير
ونار العطش في حاميات المصاهير
غريب من الشلقان ياطيب حلياه
واللي يقول من القهر زاد غبني
وتوي لقيت ظلال راسي وزبني
حسينات مثل الداب شوفه رهبني
والداب لو هو ميتن ماتمثناه
واللي نزل من شان بنتن صغيره
في حفرتن محدن يجي في محيره
والله فلا صارت بكل الجزيره
خالد ولد سودي سليل الدعيجاه
والمنسلح رجلن من اهل القصيمي
ينصف معاشه للضعيف اليتيمي
عشرة اعوامن كاتمينه كتيمي
ولابان لين الله بعفوه توفاه
مرحوم يانسل الشيوخ الكرايم
ياللي بذلت المال والعفن نايم
الله يحلك عد ماقام قايم
وعسى جنان الخلد داره وملفاه
وعجايب الدنيا بنجد العذيه
سوالفن باقدار رب البريه
بالصدق ترويها الرجال النقيه
وصدقه ثبت عندي ولا به مراواه
اعجب عجايبها على ابالخساير
انجب من الخفرات سبعن حراير
وجابن شيوخن ماتهاب السعاير
والكل منهم شاخ من طيب يمناه
الاوله جابت (مكازي) على الطيب
اللي رمى شاته يبيها عشاء الذيب
والثاني (الطيار) سيف المعاطيب
اسمن وكل الناس تسمع بطرياه
والثالثه جابت على الطيب (ساجر)
اللي يغير بحاميات الهواجر
وعقبه (ابن شامان) سيل المحاجر
اللي يصب السمن صافي بيمناه
والخامسه جابت (خلف نسل ناحل)
شيخن يمينه مثل شهد المناحل
وعقبه (جديع) اللي يبوج المراحل
جديع ابن قبلان بالصبر مااقواه
والسابعه جابت محمد بالاخبار
(ابن سمير) اللي حمى جيرة الجار
مامثلها صارت على كل الاقطار
وابالخساير شاد ساسه ومبناه
ونسرن بحايل في نوايف جباله
اللي نقل كتف الضحيه وشاله
شيخن من الجربان واهل الشكاله
ومن الجزيره جابه النسر وألقاه
واللي فهم تفكير خصمه بحايل
سعدون قال اخشى كريه المثايل
والخيل بدل كدشها بالاصايل
وقاله مبيريك الذي صاب مرماه
واللي بنومه شاف شين المعارك
والصبح حط الوصف كنه مشارك
العرفجي شيخن وسيع المدارك
وصارت مثل ماقال في وصف رؤياه
واللي لمح زيتن قطر بالطريقي
من موترن والشمس صيفه حريقي
وفهد الحمادا له ضميرن رقيقي
قال ان هذا مادري في بلاياه
ومشى على دربه لوسط النفودي
ولقاه عطلان(ن)عطاش الكبودي
معه بناته مثل لون الورودي
كانوا قريب الموت لولا الله انجاه
والشعر كان اول بطرق الهلالي
قبل يتطور بالعصور التوالي
ورقى الخلاوي مرقبه بالعوالي
وبريك مع شايع خذو من نداياه
واللي بدى القافين راع الحريقي
محسن وهو قولن ولا هو وثيقي
ولا احدن جزم باللي بداها حقيقي
ولا هي غريبه عند محسن ومسراه
وجيل الذهب بالشعر جيل ابن لعبون
وابن سبيل والدويرج بلا هون
وشالح وتركي والربيعه وسعدون
والعوني اللي شب بالقاف غاراه
وجيل ابن هادي ذاع بالقاف تاجه
وراكان يضوي بالقوافي سراجه
وعبدالله المسطور يضبط مزاجه
وفجحان له بالقاف سجه وروحاه
والشاعر اللي نافلن كل الازمان
وغطى على شعر العرب وين ما كان
اللي نظم في كل الابواب قيفان
ولا تصلح اشعار المراجل بلياه
هذا الفحل بالشعر نفسه عزيزه
محمد القاضي مرابي عنيزه
ربعه تميم وله على الناس ميزه
شره على الدجال لا بان طرياه
وقصايد اهل الطيب مثل الجواهر
لا صاغها عقلن بالاشعار ماهر
مثل المطر ينزل من المزن طاهر
والناس كلن له هقاوي وشوفاه
وقصيدة النجدي حصانه عريبي
ومثله بديوي بالمثايل عتيبي
وابن مهلهل صاغ قافن عجيبي
ورميزان ابن غشام والقاف يزهاه
وقصيدة القاضي عسى الطيب فاله
والابل معلومن بالايدي عقاله
خمس(ن)قليـل(ن) بالقصايد مثاله
وباقي القصايد كالزهر في شغاياه
وقصيدته في دلة(ن) تقل غرنوق
وريح القهاوي فايح(ن) يفضح السوق
في مثلها ماهو من الناس مسبوق
حيثه بنفس الوقت بالقاف سواه
وجت له عنود(ن)لاختباره بياحي
وقالت ترى قلبي تقل سمح ضاحي
يامن يلم السمح والسمح راحي
قال المطر يسقيه والحصد يقفاه
ومثله لابن مجلاد ياصف بها الكيف
وذعار بعتيبه بديع التواصيف
واللي دلاله كالبطاط المهاديف
ودغيم اللي شاعر الربع ناحاه
وقاموا بتقديم الثلاثة فناجيل
لشيخ الجموع اللي يقود الرجاجيل
والفارس اللي يتعب الهجن والخيل
وراع الصخى ربي من الفقر ياقاه
وهايس عطى الاول لطيب العقيدي
والثاني المكرم وناره وقيدي
والثالث الفارس سطام العنيدي
وذعار خالف بالفناجيل واياه
والاول اصبح بين الاقوام فارس
ثم العقيد اللي يقود الفوارس
وراع الصخى كفه للامجاد غارس
وهذي تراتيب العتيبي ومدلاه
وابن عشوي بالطيب من روس قحطان
حط الكريم مقدم(ن)طول الازمان
بقصة حريم عياله اللي بقيفان
والجايزه خاتم على الدرب لاقاه
وزيد الخوير اعطاه راع الشجاعه
ثم الكريم اللي عطى الناس صاعه
سوالف(ن)للطيب صارت بضاعه
يوم الردي كل(ن)يسبه ويشناه
واللي بالاجرب صار مذكور سيفه
بالقاف يظهر للقرابات حيفه
وطار الكرى من موق عينن شريفه
باسباب من خالف لتركي وصاياه
وفيصل شرح غيظه على صاحب(ن)باق
وقصره لهم عن لافح البرد مشراق
ويقول ذا قوله وبالرب وثاق
ويمدح تميم اللي للاتراك ماذاه
والشيخ جاسم في قطر له مكاني
وانا اقصد اللي يشتهر بابن ثاني
قصيدته باهل البدع به معاني
وفيها لمنهاج السلف خوش شاراه
وعنده حزينن قال شعر(ن)حزينا
وحنا شبعنا بالعناء وارتوينا
وحنا على مرسام بيته بكينا
هذا محمد والفياحين منشاه
واشعار غانم يشعل الحرب قافه
وردهان يطفيها بحلم ولطافه
ويجيبها العوني ويلعن سقافه
قافه مثل ضرب المدافع سمعناه
وقصايد الحكمه والاجواد كاره
ابوزويد قام يرفع شعاره
وابن شريم اللي مشى في قطاره
اللي بحرف الكاف سارت سراياه
مثل بركات اللي على الكاف شده
نصح(ن)بتجريب الزمان استمده
والدسم نصحه صوب الاخوان رده
غير الشوارد فيها الامثال حلواه
والا البرازي في غرايس منيره
يسمع لشيخن بالجبل بان خيره
واعطاه شارات الزمان الخطيره
وشافه وقال ابيات شعرن عجيباه
ويانجد من سماك نجد غوى اسماك
واللي على الرجلين ماهو ولا اياك
فهد وطى منها مشاويل الاشواك
ابن صليبيخ الذي ذاق مكواه
والاشقر البيطار نافح عن الدار
والسبع عمره ماولد تيس وجفار
واسكت فهد ياناس في زين الاشعار
لكن قصايدهم كما المسك طرياه
ومثله شكى من قال شابت لحانا
شابت وحنا ما لحقنا هوانا
وفقر القرايا في نعاله وطانا
رجل(ن)من الاسياح يشكي بدنياه
اما الغزل باللي جماله مليحي
هذي لمحسن قافها والوضيحي
وابن سبيل جاب وصف(ن)صحيحي
لام العيون اللي تقل وصف ساعاه
وساكر نظم قاف(ن)لعن فيه قطاش
يزعل على ما لون ويرضى على ماش
وعقبه دعى له دعوة(ن)تقل رشاش
باللي ذبح ناس(ن)تقيم الصلواه
ايضا وصوفه للذلول الاصيله
وابوزويد له وصوف جميله
لاشك عايد صعب تسمع مثيله
في وصف زينات الركاب الاصيلاه
وابن دويرج جاب قاف(ن)طويلي
في وصف ريمن رمش عينه ظليلي
اللي رمتني بالمحبه عليلي
مثل الذي قبلي تعرض للآفاه
اللي وقع من رمش خاضب كفوفه
ولاجل المحبه طاح يشكي حتوفه
مثل الدجيما والمطوع حسوفه
ومخلد نخى وادرك حبيبه بلاماه
واللي لبس من شدة الوجد خيشه
باسباب ريمن طاح من قصف جيشه
وطاحت حياته بالمحبه غشيشه
محمد العمار لا حل طرياه
واللي لاجل خله شرب كاس الامرار
ونخى منير وصاح في زين الاشعار
ويامنير ماجاء لك عن الترف ذكار
وذبح غريمه وانتحر عقب بلواه
وثلاث الاخوه من عيال الجلاعيد
واحد ورى الثاني يموتوا مشاريد
باسباب زين العين والردف والجيد
وام الثلاثه بالحشى نار شكواه
واللي شكى همه لورق(ن)تنوحي
يقول روحي كن روحي تروحي
ابراهيم بن كنعان قلبه يفوحي
ناظر شريفه والمرض قام ياطاه
وجتنا علوم رجال طاحوا ضحايا
ولا طاح بـدروب المحبه صبايا
باسباب ضعف البنت بين البرايا
ترضى وكل عهود الاحباب تنساه
واكثر فحول الشعر لاهل القصيمي
جابت رجال(ن)شعرهم بالصميمي
في وقتهم بالشعر ما له لطيمي
وثلاثة(ن)منهم لحايل خذيناه
اول كسايبنا خذينا السنيدي
اللي بجيرتنا وطيبه سعيدي
يقول حايل هي هنايا وعيدي
وحنا من صنوف الحبابه عطيناه
والاشقر اللي ساكن(ن)في حشانا
اللي بقيفان الحميه كفانا
الشاعر اللي بالموده شرانا
وحنا على درب المحبه شريناه
ومحمد العوني شديد النخاوي
اللي كما ذيب(ن)على الجال عاوي
قصايد(ن)تشعل قوي الهقاوي
وصارت سبب سجنه وحزنه وبلواه
وفي قرننا الرابع عشر يالاكارم
جيل(ن)حوى عـدة فحول(ن)صوارم
وهو عندنا نسميه جيل الخضارم
واشعارهم في سهل الالفاظ تلقاه
مثل السديري مع رشيد الزلامي
ومحمد الديري رفيع المقامي
والا الازيمع في لذيذ الكلامي
مع زبن ولد عمير مابه مراواه
وقصايد(ن)شاعت لصقر النصافي
وبدر الحويفي بالقنص غير خافي
والا التبانا قاطعين الفيافي
والخس مع عادي وابن عون ناجاه
والا الفيحاني بالقصيد الثميني
اللي كسى قافه بعقل(ن)رصيني
خالد جمع بالقاف دنيا وديني
يشبه قصيد العود مطلع ومنهاه
والجيل هذا جيل بندر وكادي
اللي شهد له حضرها والبوادي
ابن سرور اللي وطى كل وادي
في وصف زينات المواتر وطرياه
وقصايد النسوان حرفه نشيطي
مثل الدقيس وحبها للسويطي
ومثله مويضي ثم بنت السليطي
ندمت على اللي طاعها في وصاياه
وظويهره قافه سبايب حروبه
بنت الشراري للرجال مهيوبه
ومويضي العجمان قافه عجوبه
وجديع لاجل الشعر ياناس خلاه
والشبرميه حذرت ربعه الذل
جابت كلام(ن) كالرصاص ابهر الكل
وبعذر السحاب اليا ترزم ولا هل
وفكوا دخيل البيت حوض المنياه
مع نورة الهوشان شافت قليبه
واللي نبي عيا البخت لايجيبه
صارت مثل للي عسير(ن)حبيبه
من جملة امثال الرجال الشهيراه
والا الذي يشرح همومه والاسباب
وقال ان هذا هو بلى ابوك ياعقاب
قاله نمر واليوم في كل الابواب
مايوم يمضي كود نسمع بطرياه
مثل الذي يرجي وليه نوايله
اللي رزق داب(ن)عمى من فضايله
لا طالعت برق(ن)ولا هي مخايله
وحجرف خذى منها دلايل وعبراه
وراع الغلط يلقى الشماته من القوم
ومن طاوع الثنتين يصبر على اللوم
النفس والحرمه تخليك مهموم
مع عبد ابن هذال والركب خلاه
ومثل الذي ينذر قضاة القبايل
لا صار ميزانه عن الحق مايل
وقاضي السماء يعلم جميع الفعايل
والشيخ جاسم قال الاعمال يلقاه
وتقول للي حط للكذب تمثال
يظلم كرام النفس ماضين الافعال
والقد ما لانت عراويه بتفال
حكمه لابن لعبون مع شخص هاجاه
ويقول للي طاح والخير فاته
واصبح قريبن ياعرب من وفاته
محدن يسد السيل عنك بعباته
وبعض البلاوي ماترده بفزعاه
وتقول للي بالشرابيك بلشان
اضرب على الكايد اليا صرت بحلان
وعيبن على اللي يختفي عقب مابان
لابن رشيد عبيد يخبر رعاياه
ومثله على المعنى اذا كنت داري
والعمر ماياقاه كثر المداري
عن مقعد(ن)تصبح من العز عاري
هذي لتركي شيخ نجد(ن)ومركاه
واللي يدوهج بالسهل مع جروفه
من دون حاجه تفرضه له ظروفه
ومشيك بلاحاجه تره قل شوفه
ابوحمد قاله على حسب روياه
والصدق يظهر لك على كل الاحوال
وماضاع وقت الصوم يظهر بشوال
والناس تدري بالجدايد والاسمال
لابوطلال الشيخ في شرح بلواه
واضرب ولدك ان كنت تبغيه يشفيك
ولو زعلت امه لاتخليه ياليك
وتيس(ن)يحطه وال الاقدار بيديك
بركات قاله في مثاني وصاياه
ومن كدر الصافي شرب من زلاله
والدار تحمي بالشواطير جاله
وان كان ماتدرى عواقب رجاله
قال الوبير البنت يكشف مغطاه
واللي يباعد عن دروب الهواني
ولا ياخذ الحاجه عقب شخص ثاني
ولايشرب القفوات كود الهداني
لراكان بن حثلين قافه وحلياه
وهو قال قول(ن)للاوادم ذخيره
والهرج يغني صامله عن كثيره
عن عالم(ن)بالهرج يكثر هذيره
وياشين هرج(ن)زايد(ن)غاب معناه
واللي يفكر بالوقوت الخوالي
وانته تشوف الهرج ماله مجالي
تقول له ياهيه ياهملالي
قاله جديع الشهم في وصف دنياه
واذا نصحنا اللي برايه عصانا
نقول له لاشاف صادق هوانا
انته تقول هنا وانا اقول هانا
في قاف ابن سراح والجوف مرباه
والناس بالهمه وصوفه بعادي
والحر الاشقر لا لقى الجول صادي
والتبع يفلس من عمود الجرادي
هذي لابن خربوش راع الجزيلاه
واللي لقى عند الجماعات غيضه
من عالم(ن)صارت قلوبه مريضه
شمس الخيار ولا ظلال الفريضه
هذا المزيني بالبيوت الثميناه
واللي يبي يسلم من الناس كله
مدام قرب الناس للقلب عله
ولا جنبك شر المخاليق خله
قضيب قاله والقصيده ذكرناه
واللي يشوف الناس تحتاج توضيح
والطيب كل(ن)نال من هبة الريح
قسم(ن)وهو بين الوجيه المفاليح
العنقري قاله لبنت(ن)تهزاه
وعبيد عاش وشاف جور الليالي
الاسعدي راع البيوت الجزالي
والعود يوم انه يجيب العيالي
يبي بتال العمر لذه وطرباه
والا الدقيس ونصحها للرفاقه
ولا تستخيل البرق لو هو شفاقه
ومن لا يودك نور عينك فراقه
بيتين تسوى له قصايد وقافاه
والثالثه تسليم رب السريره
ويالله عسى ماتكره النفس خيره
للي جعل رب البرايا ذخيره
سبحان رب العرش رب السماواه
وابوجري زين المثل داج سوقه
والعوشزه ماينزل الطير فوقه
ولا به مقيل لواحدن بان ذوقه
هذا الجنوبي صاغها في وصاياه
او راضي القصاد جاب النصايح
يقول شاور من يحوز المدايح
واترك كلام اهل الردى والفضايح
ومن شاور البايه على قالته باه
واللي درس زين المثايل دراسه
وراع الجحش يلبس مع الدرع طاسه
بوقتن به الحصني يدور الفراسه
ابو زويد جابها طاب ذكراه
والثالثه قاله يحذر رجاله
اللي تهين النفس ترجي رياله
تر ربع يومن مقعدك بالشكاله
تسوى حياة العفن وسط المهوناه
واللي يهدد واحدن بالنكادي
من عقب صبر(ن)مثل صبر المهادي
قال الوعد لاسال بالغيث وادي
هذا اللميع يهدد اللي تحداه
وثوب المعزه لاغدى فيك ضافي
تقول باقي عمرنا للذلافي
واليا حصل عز(ن)مع الكيف كافي
زيد الخوير وقال مابه حسافاه
واللي يسير بدرب ماهو وكادي
يظن فعله بالعرب فعل عادي
ويغويه عن نقل الصميل البرادي
وابن سبيل قال للناس شوفاه
وان جيت تنصح واحدن مال شيله
وتبيه يفزع للسيوف الصقيله
والحق ظلماء والمصقل دليله
لظويهره تشكي طبوع السبيلاه
واللي نشد يبي الكرم والوقاره
تعطي وصوف الرجم في راس قاره
مار البلى دونه جحور وخباره
هذا الرويلي ينذر اهل الردياه
وراشد يقول الثوب لو كان خيشه
او عاش عمره ساكن(ن)في عريشه
شربه قراح الماء مع الناس عيشه
لاصار مكفي الهموم الشديداه
وان صار فيه امرن يجي منه مثلام
وتبي العرب تسرع مع الطير لا حام
شي يفوت البارحه كنه العام
ردهان قاله واخمد الحرب واطفاه
واللي نخى بالطيب يبي الرفاقه
يبي الفزع للقلب حيثه شفاقه
وما من ورى عوج النصايب صداقه
يقوله الهربيد وجريس شاكاه
ومن لازم المشراق فوق الوسايد
يموت ماحاشت يديه الفوايد
ومن طاب ينخى في وقوت الشدايد
هذا الخلاوي زين قافه ومعناه
واللي خذى زين المثل دايمن فن
وحصان طيبه بالملازيم ما كن
واعرف ترى سن اللبن يقلعه سن
لمحمد بن سعود والزين يزهاه
وياحيف وان الحيف مايقري الضيف
من لابة(ن) لاغبت عنهم مواليف
وان جيت مجلسهم تجندت بالسيف
لسمير بن زيدان شيخن عرفناه
وكان القرابه في غثى البال هانوك
تقلط على البارد وتنزح عن احوك
ولا ينكره بعد الرفاقه اليا اوذوك
يقوله النوري لنقوة دناياه
واللي مشى بالراي عكس المسارا
ماينفعه شور العرب والنصارا
واللي يضيع الليل يرجي نهارا
ومن ضاع وقت الظهر ضاعت حلاياه
وابالشيوخ افعال غيره حمدها
خلف اليا جاء الخيل يقطع جهدها
والطيب واجد مير هذي وحدها
يمدح رجال(ن)طيبهم طال مبناه
والله نشد ياحمود عن معرفة يوم
الاحمدي قاله لاجل يترك الدوم
وياحمود يظهر لك صديقن من القوم
وتاتيك من بعض القرابات غاراه
واللي تسبب في شباك(ن)تصيده
ومن فعل كفه ذاق همه وكيده
وكم لحية(ن)جاها خراها من ايده
بنت السليطي قالته عقب بلواه
واللي تغرب عن دياره وريفه
والطير بالجنحان محلا رفيفه
ويمنى بلا يسرى تراها ضعيفه
هذي لابن روسان عقب القراباه
واللي عطى غيره من الغانميني
ولا يستعيده في قساوه وليني
وحنا عطيتنا عطية غبيني
لهايس من المجلاد وذياب راكاه
ومن قال انا البلوى يلاقي بلاوي
ويصير باقواله من الربح خاوي
وقت الهلالات الذي صار هاوي
وبعض الرواة لساجر الطيب ينصاه
واللي بصدره حاجة ماهرجها
ضايق ويرجي من وليه فرجها
نقول رجلك بالوسيعات سجها
قول السديري للذي عاف دنياه
ويقول تر ظلم القرابات حساس
وكان انهم كانوا سبب كل هوجاس
مالك مشاريهن على نايد الناس
للي ربوعه دايم الدوم تشناه
واللي يسولف في مجالس هملها
لو هي هروجن مثل ريحة نفلها
تسمج اليا عرضت على غير اهلها
في شعر قحطان الجليله سمعناه
واللي يذوق الجور والوقت واطيه
يبي لطيف القلب عن شوف قاسيه
حيثه ليان ومن لقى اللين يتليه
يقوله الهجلي لشيخن ترضاه
وحسد العرب مسبوك في ضامره سبك
وان شاف طيبك بين الاقوام حاربك
لافاعلن فعلك ولاهـو مجنبك
هذا الزلامي يخبرك كيف دعواه
سوالف(ن)للطيب صارت دلايل
وفيها لصدق الهرج قول وفعايل
والصدق واضح ندعمه بالمثايل
من راوي(ن)في مصنع الذهن نقاه
جاب المثايل في جميلات الالحان
اللي يناديه العرب يابن غسلان
والله فلا توزن حروفه بالاثمان
ومن يبذل المعروف له يوم يلقاه
ذكرى لمن ينشر دروب المراجل
وقاسى طعونن موجعات(ن)عواجل
من فوق طعنات العيون النواجل
من رمش ريم(ن)عذبه يوم راعاه
موضوعنا يمكن يصير الاخيري
مادام مالي بالخلايق نصيري
الطيب طيبي والكرامه لغيري
وان طحت محدن قال يالربع ويلاه
ان طاب غيري ثاروا الربع تصفيق
وان طبت انا تسكت جميع المخاليق
وانا ادري انه غيرة ام المخانيق
وزادو عليها لاجلنا عشر غيراه
ياما وقعت بوسط ربعي مريضي
ومن طحت عنده ثار مثل العضيضي
وان كان قلبي في حياته حضيضي
اكفخ كما طير(ن)عجاجه تقفاه
ياسرعهم ياناس في نشر عيبي
زود(ن)على جحدان جهدي وطيبي
ما كني الا للجماعه حريبي
عزاه من حالي مع الربع عزاه
اصبحت كني للمخاليق شمعه
توضي وترسل من لظى النار دمعه
ومحدن رمع جرح المعاليق رمعه
وحنا اليا ضاق الرفاقه رمعناه
اربعمائة بيت(ن) بكل القوافي
من ضامر(ن)قافه عزيز(ن)وصافي
وعليه ثوب(ن)باللوازيم ضافي
ووسط الجبل تبقى مدى الدهر ذكراه
والحمد لله عد ما لاح بارق
واعداد نور(ن)من لظى الشمس شارق
من خافقن تكويه نار المطارق
ورقى جبال الصدق ما هاب مرقاه
تحيتي :)
قصيدة الشاعر والراوي المعروف فواز فهد الغسلان الشمري
التي صنّف فيها 100 رواية من علوم الطيب والمرجلة عند قبائل الجزيرة العربية
فواز ابن غسلان يهدي سلامه
والحمدلله هي بداية كلامه
نرجيه يرحمنا بيوم القيامه
في ساعة ماينفع المال والجاه
قلبه يروم الباديه والبداوه
والناس في ميزان حكمه تساوه
ويشهد لمن حاز الصخى والنقاوه
واللي زعل من قولنا مااترضاه
ان كان يزعل عند قول الحقيقه
محدن قدر يرضي جميع الخليقه
وحطيت لأهل العرف عندي وثيقه
من شان كل الناس تاثق وتقراه
اليوم بعض الناس صارت ذيابه
تبني بيوتن كان ساسه خرابه
واللي يريده يكتبه في كتابه
ويطبع كتابه بالسنه عشر طبعاه
وانا نويت اكتب حروفن نقيته
بالحفظ واسفاره تعبت وشريته
وعندي دليل اللي جزمت و رويته
ودرب الخطأ لازم بالاقدام ناطاه
ناطى الخطأ لكننا ما نعيده
ولاطعت شيخن طامعن في رصيده
واللي كذب بالقول غصبن نصيده
ولو يشتمن وسط العرب ماشتمناه
واذا ثبت لي غير ماكنت راوي
راح اعترف دامي للإصلاح قاوي
ولاني على ذكر الخطايا قصاوي
والناس محدن سالمن من حكاياه
ولا اقول محدن يفهم الصدق غيري
وابقى بوسط اهل المعارف صغيري
والعلم مثل الموج شربه عسيري
ونرجي ولي العرش رب البرياه
اذكر روايات علومه شهيره
صارت لمن عاشوا بوسط الجزيره
وما اقول انا ماصار بالطيب غيره
لكن ذكرت اللي سمعنا وقلناه
الطيب واجد غير ماصار معنا
وحبيت اعد اللي بصدقه سمعنا
وهذا الذي لأهل المكارم جمعنا
والصدق ياصلنا ولو ماوصلناه
أروي رواياتن ثقاتن شهوده
أعطت على صدق الروايه عهوده
ولا نظلم أجواد العرب في لحوده
قوم عطونا ثم قومن عطيناه
وعندي لها قلبن فهيمن وحافظ
ولسان مع صدقه فصيح الملافظ
وعقلن لكذب أهل الفراغات رافظ
وكله من اللي كان ضقنا دعيناه
وبعض العرب مقبول للناس قوله
وسارت قلوب السامعين بقبوله
والكايده يلقى طوارف حلوله
ولا يكسبه رجلن على الكذب مركاه
واللي روى علمن ولا احدن درى به
علمن كبيرن مثل شامخ هضابه
نقول يا أهل العرف من وين جابه
كيف اختفى دامه مثل ظلع اباناه
وكتابة التاريخ ماهي فزايع
ولا فيه فرقن بين شابع وجايع
ولا فيه غاراتن وكسب وقلايع
والظلم يورث داخل القلب حسراه
ونويت أرتبها على الطيب ترتيب
أقوى المواقف وأفضل الناس بالطيب
مواقفن من دون شكن ولا ريب
وجميعهم بالطيب حاشوا مزاياه
هذا وتفضيلي لنفس الفعيله
ماهو لنفس الشخص والا القبيله
كم واحدن حاز الندى والفضيله
ورقى جبال المجد لو ماذكرناه
وأبعدت فيها عن علوم الحرايب
أو ذكر نقص الناس والا العايب
وذكرت فعل الطيب وقت النوايب
فيها لجيل اليوم حكمه وعبراه
وشاورت فيها كاسبين النفيله
اللي يشوفون المغالط فشيله
ولا همني كونه من ايا قبيله
يهمني صدق الروايه وذكراه
أعظم مفاخرها خذاه السويطي
صنيتان جرحه بالضماير محيطي
قلبه بلاهوب الوفى يستشيطي
ابنه على جاره تقدم وذكاه
والثانيه طيبه خذاه السبيعي
اللي فعل له فعل ماهو طبيعي
لأجل المهادي والشرف لايضيعي
مفرج شلع راس الولد ثم درباه
والثالثه عمران ولد البجيدي
أدخل دخيله عن سيوف العنيدي
وهو يطلبه دم الولد ياعضيدي
عسى ولي العرش بالطيب يجزاه
والرابعه طيبه لصبر المهادي
مع جاره اللي في ردى البنت زادي
وقال اصبري والصبر درب السدادي
وصبر ثمان سنين والظيم ياطاه
والخامسه شيلة خويّن كسيري
اسبوعين ماهابوا طريقن عسيري
وفازوا بها الشلقان عقب المسيري
وكسيرهم في زين الأشعار جازاه
والسادسه للي بقرن الشمالي
أدخل عن الأتراك من كان جالي
والترك جيشه مثل وبل الخيالي
وابن سمير اعلن مواقف حمياه
والسابعه شاله حمد ولد عيده
نخاه مربوطن شكى نار قيده
وصار الثمن في كل ماحاشت ايده
من قوم ابن مرشد عسى الخير ملفاه
والثامن اللي قدم الطفل نايف
للذبح عن جارن حريمه ضعايف
سليمان قال الطفل نلقى خلايف
وبني عطيه طيبهم طال مبناه
والتاسعه طيبه لشيخ الظفيري
اللي حمى ماجد بسيفن شطيري
راع البويت اللي مقامه عطيري
دغيم ثنى دونه عن القوم وأنجاه
والعشر ابالظلعان يرجي خويه
كسير طاح بسهلة جرهديه
ربعه تميم أهل العزوم القويه
شهرين لين الله من الكسر شافاه
حادي عشر للي عطى الشاة ذيبه
ذيبن كبيرن والدغيري رضي به
ابن سعيّد شاع بالناس طيبه
يوم العرب بالجوع تبلش بدنياه
ثاني عشر للي بليله يصيحي
للي وقع من جوع بطنه طريحي
يوم المجاعه والزمان الشحيحي
ابن مهيد اللي على الطيب ناداه
ثالث عشر للعوهلي مع جريحه
تسعين يوم وكل يوم ذبيحه
ربعه عتيبه والصخى فاح ريحه
وهذي سلوم المرجله يالقراباه
رابع عشر طيبه لشيخ الشرارت
اللي هوادي ضيفته روس خلفات
خلف رمى في مجحم النار طاقات
وأكمل عشى ضيفه ولا قال حيفاه
وعقبه مشى من شان عشق الرويلي
محسن طواه العشق وأمسى ذليلي
ونخى خلف راع المقام الجليلي
ومشى لعينه بس ربي توفاه
خامس عشر للذيب والطيب فاله
من نقوة العجمان وأهل الجماله
ومن طاب طيبه ياصله من خواله
ماخاف تهديد المهندس وفرقاه
سادس عشر للي نقض سقف بيته
حمد كريمن في بلي ذاع صيته
يوقد عشى ضيفه وفعله رويته
وعقبه وقع بيته ولاجاب طرياه
سابع عشر للي قعد مع خصيمه
عقيل والمجدور من دون خيمه
عقب العداوه صار خصمه نديمه
صعبن ولد عمه يذوق المهوناه
ثامن عشر للي عرف حق جاره
واسقى الغنم من در غالي بكاره
هجرس من التومان والطيب كاره
ساق الغنم والناس تمشي بممشاه
تاسع عشر والجار شالوا شياهه
فوق الخيول وجارهم بان جاهه
والحرب ماتمنع رجال الوجاهه
مطارفة وايل على الطيب منشاه
وعشرين شيخن مات من صوت ناخيه
فايز مع ابن سويط والضيم كاويه
وياغيبة ابن هذيل بالحال تنهيه
وعقوب من غيضه على القبر خاواه
واحد وعشرين ابن ناحل وطاريه
لو ماكسب يعطي ضعيفه ويحذيه
شيخن ولايترك طريقن مشى فيه
واشعار ابوماجد بالامداح تلقاه
واثنين والعشرين من شان جربوع
من ملحته ذود المعادين مرجوع
وهي لقمتن ماتطرد الضعف والجوع
معروف بسبيع العزيزه حلاياه
وثلاث والعشرين راع العطيه
لنهيت ولد بريك ماله جزيه
شيخ الظفير اللي كفوفه نديه
لصديق ابوه اللي من الضيم ينخاه
واربع مع العشرين يرقى سنوده
وعن غرة الجارات يلزم حدوده
يقول مثل اللي رضعنا ديوده
طيبه لابن هذال والمدح يزهاه
والخمس والعشرين راع المسيره
صوب الكويت اللي دروبه عسيره
عجوز تبي التمر ياصل صغيره
وطيب الصعيدي راف به ثم وداه
خمسه مع العشرين فازت ربوعه
وجبته على الترتيب في كل روعه
واللي يجي بالطيب في مثل نوعه
ومن دون ترتيبن ابي اذكر حلاياه
وان طبت ياراسي كسيتك عمامه
لابن سرار اللي شهيرن كلامه
وهو من بني شهران رمز الشهامه
وابنه عمرو جاء من خواله وداواه
واللي حلف بالله من شان حصه
ولعيون حصه حالفن ماتمصه
هذا الدريعي كان ودك تنصه
الشيخ ابن شعلان سارت سراياه
واللي من الجربان قاد المسيره
خمسين ذيبن من حدود الجزيره
وخذى بثار اللي وقع وسط بيره
هايس ولا هاب السباع المضراه
واللي قعد بالدار عقب الجماعه
اللي مشوا والحرب يوضي شعاعه
ابن عقيل اللي خذته البتاعه
من نقوة السرحان صالا شظاياه
واللي كفل بالطيب رمل القبيله
وعشاء الأرامل كافله كل ليله
ابالرمل سالم فعـوله جميله
من روس شيخان الكرام الطوالاه
والله ستر بالطيب عرض المعازيب
ودهن كفوفه سمن من كثرة الطيب
ما حط بكتوف المعزب كلاليب
المرتعد ومطير بالطيب كافاه
واللي طرد ذوده قبل يارد البير
كله لاجل يسقي ركاب المسايير
سواه ابن طارش خوي المناعير
وطاح العشار من الذي طاب في ماه
وبمطير سواه ابن هدباء عياني
مع العتيبي في قديم الزماني
ولا واعذابي كان جاري حداني
قاله سمير وراعي البير بداه
واللي حمس واحرق خياش القهاوي
ابن لحيدان التميمي شفاوي
يوم الدهر يمنع ردي الهقاوي
منتوج صنعاء جابه الشيخ واغلاه
واللي نقد فنجال شيخن خطيري
من يوم ذاقه قال هذا دميري
هرجه رفع بالحيل ضغط الاميري
وابن ظويهر صار صادق وراعاه
وشيخن سمع نخوا رفيق الشليمي
يبي النياق اللي تقل جول ريمي
ماخوذ ينخى له شجاعن كريمي
وعبدالكريم اقبل على الذود واعطاه
مثل القريفه قال وين الحميا
ومطير ربعه شاع طيبه بليا
والطيب للي راقدن ماتهيا
وراع الصخى ربي يعينه بمسعاه
وصعبن على اللي مايعرف العطاوي
شليويح ويلك كان صاحت مضاوي
بالسلم قلبه للعـذارى هـواوي
وبالحرب ويل اللي على الخيل لاقاه
وراكان ابن حثلين فوق الحصاني
اعطى رجال الترك درس ومعاني
ولا يشرب القفوات كود الهداني
يطرد بها اللي خانته عقب فرقاه
وصوارم الهيلا فعوله صعيبه
ردو نياقن عقب ماهي نهيبه
حيثه حلب في راس تركي حليبه
شيخن صواريم الرجاجيل تنصاه
واللي بحايل شاخ فيها وطابي
وسموه بالشدات سمن العرابي
محمد الطيب كريم المرابي
ابن علي ستر الهنوف المحناه
ايضا الكريم اللي بوسط الجلاعيد
له مجلسن من جاه كنه ضحى العيد
الدهمشي فوقي سميراء تقل حيد
الحب صاعن والرطب كان وزناه
وابن مغامس جاب تمرة جنينه
والجوع وسط الكبد مثل المكينه
وشاهد طريح الجوع ظاهر ونينه
واعطاه تمر الطفل والرب كافاه
واللي دفع مدى العرب لاهل جاره
اللي توفى عقب طيحة جداره
ساق الديه في طيبته واختياره
عند الدواسر بالروايه خبرناه
واللي قبال البيت مثل النثيله
مخلوطتن مابين بنّه وهيله
حتى المعادي قال حربه فشيله
شيخ المناقر من بلي طيب الجاه
وابن لهيلم وقفته لابن غسلان
اعطاه شاة الضيف لو كان زعلان
قال اسكتوا عن راعي الطيب يافلان
لولاه ضايق ما تقدم على الشاه
وزيد العجاجي عقب طيب التميمي
اللي جميله بالزمان القديمي
انجى حلاله من قرار الخصيمي
وعادت جفيفاء عقب الامحال واحياه
واللي يهلي بالبقر وسط ليله
يظنها ضيفن رمى الجوع حيله
ابن فزير اللي مثل وبل سيله
من مزنة(ن) بالوسم سالت شغاياه
واللي بني لاجل الكرم حوطتيني
لاجل الضيوف اللي يسار ويميني
بالمستجده والكرامه تبيني
ابن ربيعان التميمي تبناه
واللي صبر قدام ضيم القرايب
وماتوا عياله من عطيب الضرايب
واخوه راح وصابرن للمصايب
جديع بن قبلان والعفن يفداه
واللي نقل بالطيب بعض الحجيجي
اللي ركايبهم غدى له هجيجي
وساروا حفايا تحت ريح وعجيجي
واولاد الازمل والركايب عطاياه
واللي ختم زين القوافي بيائي
اللي خيوله جاهزه للندائي
اعاد ذوده مع حلول المسائي
الغيهبان ومرة الطيب مرباه
واللي يقيم اسبوع في مدخل الشيخ
من شان رجلن من رجالن مطانيخ
وحمى ظويهر عن سيوف المناويخ
هذا عبكلي شيخنا في حمياه
والشايب اللي ماتحلل عظامه
الشيخ ابن هادي عزيزن مقامه
في مجد قحطان العزيزه علامه
اقفى على بيض الفعايل وخلاه
واللي عطى وصفه لكل القبايل
اللي حمى بيض النعام الطوايل
شيخ العريعـر من رفاع الحمايل
مع ماجد اللي يطلب العفو باتلاه
واللي نخى عدوان شيخ الطواله
يبي الكفيل اللي عليه الكفاله
وعاقب منيع وشال كامل حلاله
وسدد بريك اللي بالاشعار ينخاه
ومقرود ربعه مع شهير المغازي
ساجر فقد طيرن يروم بالنوازي
وحتى السلوقي راح ساقه قزازي
وصبر على جارن بقرده تبلاه
واللي من الاخوان طاع الكبيري
لو يضربه زعلان طيبه كثيري
ومن ضربته طاح العصا بالمسيري
وميزر خذاه وقام للاخو واعطاه
وهذا الفديع اللي فعل مثل فعله
مع شالح اللي طيب ربعه جمع له
خادم لاخوه وخاط ثوبه ونعله
وشالح قبل موته بالاشعار ينعاه
والا فحيمان الحجوري حمى زيد
وخلاه يكمل حج فرضه ضحى العيد
فك السجين اللي بسجنه شكى القيد
ربعه جهينه بالملازيم منصاه
واللي مشى فزاع من شان عيده
اللي عطوها شايبن ماتريده
واللي نخت ضاري تلاقي عضيده
والشهم اخو صلفه مشى من حمياه
واللي من عياله شكى نار الاتعاس
ودعى عليهم دعوة تجلب الباس
ومن دعوته طاحوا بقطاع الارماس
وجحيش سارت بين الاقوام شكواه
واللي ينام بجنب بنتن عنيده
شهرين والطاهر يظنه وليده
مع انها بالنوم ماهي بعيده
ولد المفضل ماكشف عن خزاياه
واللي عطى بيته لجارن ضعيفي
وعانوه ربعه بالحلال الكليفي
سواه ابن جامع وسيع المضيفي
شيخ العوازم والصخى من مزاياه
واللي عفى عن واحدن جاه حايف
يومه زبن قبرن لشيخ الطوايف
قبر الصييفي عقب ماكان خايف
وسبيع ماتوذي دخيله لـذكراه
واللي حرق من رحمته دفتر الدين
للي هرب من خوف سجن السلاطين
الطوب سواها وعندي براهين
وشعر العبيكه للشهاده حفظناه
واللي حمى النسوان عن نقرة الضيق
من نقرة المشهد على فكة الريق
اربع بناتن في وصوف الغرانيق
وسليمان بن حتروش بالطيب سواه
واللي عن الجاره عفيف اللساني
وقامت تحاول به وهو مايداني
اقصد به الطاهر جريس اليماني
اللي رفض ياطى الخنى مع رزاياه
واللي لقى حتفه بمقتل بنيه
ومثله تموت المهرة الثابتيه
يوم العرب فيها الندى والحميه
ماتوا لموتة واحدن طال مبناه
واللي نجى من كيد رجلن غدر فيه
وعزي لمن مثلي ذلوله تخليه
وقعد لها باللي حديده مصفيه
وقطع فهد حبلن عليها نقل ماه
واللي حمى لاغلى الرفاقه حصانه
في حل لغزن للخلاوي ضمانه
هذا بريك الاسعدي في زمانه
وابن سويط اخبر خصيمه وخلاه
والا الصويغ غاب سبعة عوامي
ورجع يبي طفله وزين الوشامي
وساعة وصوله طاح بيته هدامي
وماتوا وقلبه جر حسره ولوعاه
واللي من الضيقه نخى قال يادباس
تركت زين الدرب وامشي مع الساس
ورجع له اللي يشبه الطير قرناس
واعاد للشايب مكانه ومركاه
ومثله عقاب الخيل كانك تقصيت
وسعدون شيخن قال ياعقاب ذليت
واذويت من كثر العناء واستخفيت
وذاق العواجي زين عيشه بدنياه
وبني تميم اللي تشيل البعيري
شاله هل الروضه بعزمن كبيري
بعير ضيفن طاح دونه ثبيري
وابوجري ضيفن بالامداح جازاه
واللي نخت ناسن على ذبح ذيبه
اللي كلت وسط الليالي حبيبه
ثلاثتن ساروا لها في شطيبه
واحد الثلاثه صادها عقب لقياه
واللي لمح دابن براس الشطيبي
ينزل عليه الطير ظنه عسيبي
دابن عمى قدام عين الذويبي
وزاد اتكاله في بديع السماواه
واللي رحل مع صغر سنه لبغداد
واصبح لاخوه بطيبة القلب كداد
ومن المرض ناصر ولد غيث ماعاد
واخوه عبدالله بالاشعار يرثاه
والا المتينه له حروفن كريمه
ارسل يدافع عن مكارم خصيمه
وراع الكرم يترك دروب الظليمه
وحامى عن اللي قال ياكليب ياناه
واللي ترك ظبي المفالي طليقه
ذكر وصاتن شالها من رفيقه
له في بني هاجر عروقن وثيقه
هذا الخلاوي مايخلي وصاياه
واللي حمى جاره بنار القوايل
اللي دخل من خوف سلطان حايل
وعاف البلد لاجله وشد الرحايل
الدوح مـن شيخـان عبـده ومجـلاه
واللي لابن خشمان ساق النجايب
حيثه ترك له مجلسه ياحبايب
زيد الخوير اللي فعوله عجايب
في مجلسن للشيخ في عيد الاضحاه
واللي مدح ناسن مثل باشة الروم
وياحمود يظهر لك صديقن من القوم
الاحمدي من حرب بالطيب معلوم
قافه سرى ذكره مع اقصاه وادناه
واللي رفض يشرب على جمة البير
قبل الرفاقه خوف بعض المعايير
ونار العطش في حاميات المصاهير
غريب من الشلقان ياطيب حلياه
واللي يقول من القهر زاد غبني
وتوي لقيت ظلال راسي وزبني
حسينات مثل الداب شوفه رهبني
والداب لو هو ميتن ماتمثناه
واللي نزل من شان بنتن صغيره
في حفرتن محدن يجي في محيره
والله فلا صارت بكل الجزيره
خالد ولد سودي سليل الدعيجاه
والمنسلح رجلن من اهل القصيمي
ينصف معاشه للضعيف اليتيمي
عشرة اعوامن كاتمينه كتيمي
ولابان لين الله بعفوه توفاه
مرحوم يانسل الشيوخ الكرايم
ياللي بذلت المال والعفن نايم
الله يحلك عد ماقام قايم
وعسى جنان الخلد داره وملفاه
وعجايب الدنيا بنجد العذيه
سوالفن باقدار رب البريه
بالصدق ترويها الرجال النقيه
وصدقه ثبت عندي ولا به مراواه
اعجب عجايبها على ابالخساير
انجب من الخفرات سبعن حراير
وجابن شيوخن ماتهاب السعاير
والكل منهم شاخ من طيب يمناه
الاوله جابت (مكازي) على الطيب
اللي رمى شاته يبيها عشاء الذيب
والثاني (الطيار) سيف المعاطيب
اسمن وكل الناس تسمع بطرياه
والثالثه جابت على الطيب (ساجر)
اللي يغير بحاميات الهواجر
وعقبه (ابن شامان) سيل المحاجر
اللي يصب السمن صافي بيمناه
والخامسه جابت (خلف نسل ناحل)
شيخن يمينه مثل شهد المناحل
وعقبه (جديع) اللي يبوج المراحل
جديع ابن قبلان بالصبر مااقواه
والسابعه جابت محمد بالاخبار
(ابن سمير) اللي حمى جيرة الجار
مامثلها صارت على كل الاقطار
وابالخساير شاد ساسه ومبناه
ونسرن بحايل في نوايف جباله
اللي نقل كتف الضحيه وشاله
شيخن من الجربان واهل الشكاله
ومن الجزيره جابه النسر وألقاه
واللي فهم تفكير خصمه بحايل
سعدون قال اخشى كريه المثايل
والخيل بدل كدشها بالاصايل
وقاله مبيريك الذي صاب مرماه
واللي بنومه شاف شين المعارك
والصبح حط الوصف كنه مشارك
العرفجي شيخن وسيع المدارك
وصارت مثل ماقال في وصف رؤياه
واللي لمح زيتن قطر بالطريقي
من موترن والشمس صيفه حريقي
وفهد الحمادا له ضميرن رقيقي
قال ان هذا مادري في بلاياه
ومشى على دربه لوسط النفودي
ولقاه عطلان(ن)عطاش الكبودي
معه بناته مثل لون الورودي
كانوا قريب الموت لولا الله انجاه
والشعر كان اول بطرق الهلالي
قبل يتطور بالعصور التوالي
ورقى الخلاوي مرقبه بالعوالي
وبريك مع شايع خذو من نداياه
واللي بدى القافين راع الحريقي
محسن وهو قولن ولا هو وثيقي
ولا احدن جزم باللي بداها حقيقي
ولا هي غريبه عند محسن ومسراه
وجيل الذهب بالشعر جيل ابن لعبون
وابن سبيل والدويرج بلا هون
وشالح وتركي والربيعه وسعدون
والعوني اللي شب بالقاف غاراه
وجيل ابن هادي ذاع بالقاف تاجه
وراكان يضوي بالقوافي سراجه
وعبدالله المسطور يضبط مزاجه
وفجحان له بالقاف سجه وروحاه
والشاعر اللي نافلن كل الازمان
وغطى على شعر العرب وين ما كان
اللي نظم في كل الابواب قيفان
ولا تصلح اشعار المراجل بلياه
هذا الفحل بالشعر نفسه عزيزه
محمد القاضي مرابي عنيزه
ربعه تميم وله على الناس ميزه
شره على الدجال لا بان طرياه
وقصايد اهل الطيب مثل الجواهر
لا صاغها عقلن بالاشعار ماهر
مثل المطر ينزل من المزن طاهر
والناس كلن له هقاوي وشوفاه
وقصيدة النجدي حصانه عريبي
ومثله بديوي بالمثايل عتيبي
وابن مهلهل صاغ قافن عجيبي
ورميزان ابن غشام والقاف يزهاه
وقصيدة القاضي عسى الطيب فاله
والابل معلومن بالايدي عقاله
خمس(ن)قليـل(ن) بالقصايد مثاله
وباقي القصايد كالزهر في شغاياه
وقصيدته في دلة(ن) تقل غرنوق
وريح القهاوي فايح(ن) يفضح السوق
في مثلها ماهو من الناس مسبوق
حيثه بنفس الوقت بالقاف سواه
وجت له عنود(ن)لاختباره بياحي
وقالت ترى قلبي تقل سمح ضاحي
يامن يلم السمح والسمح راحي
قال المطر يسقيه والحصد يقفاه
ومثله لابن مجلاد ياصف بها الكيف
وذعار بعتيبه بديع التواصيف
واللي دلاله كالبطاط المهاديف
ودغيم اللي شاعر الربع ناحاه
وقاموا بتقديم الثلاثة فناجيل
لشيخ الجموع اللي يقود الرجاجيل
والفارس اللي يتعب الهجن والخيل
وراع الصخى ربي من الفقر ياقاه
وهايس عطى الاول لطيب العقيدي
والثاني المكرم وناره وقيدي
والثالث الفارس سطام العنيدي
وذعار خالف بالفناجيل واياه
والاول اصبح بين الاقوام فارس
ثم العقيد اللي يقود الفوارس
وراع الصخى كفه للامجاد غارس
وهذي تراتيب العتيبي ومدلاه
وابن عشوي بالطيب من روس قحطان
حط الكريم مقدم(ن)طول الازمان
بقصة حريم عياله اللي بقيفان
والجايزه خاتم على الدرب لاقاه
وزيد الخوير اعطاه راع الشجاعه
ثم الكريم اللي عطى الناس صاعه
سوالف(ن)للطيب صارت بضاعه
يوم الردي كل(ن)يسبه ويشناه
واللي بالاجرب صار مذكور سيفه
بالقاف يظهر للقرابات حيفه
وطار الكرى من موق عينن شريفه
باسباب من خالف لتركي وصاياه
وفيصل شرح غيظه على صاحب(ن)باق
وقصره لهم عن لافح البرد مشراق
ويقول ذا قوله وبالرب وثاق
ويمدح تميم اللي للاتراك ماذاه
والشيخ جاسم في قطر له مكاني
وانا اقصد اللي يشتهر بابن ثاني
قصيدته باهل البدع به معاني
وفيها لمنهاج السلف خوش شاراه
وعنده حزينن قال شعر(ن)حزينا
وحنا شبعنا بالعناء وارتوينا
وحنا على مرسام بيته بكينا
هذا محمد والفياحين منشاه
واشعار غانم يشعل الحرب قافه
وردهان يطفيها بحلم ولطافه
ويجيبها العوني ويلعن سقافه
قافه مثل ضرب المدافع سمعناه
وقصايد الحكمه والاجواد كاره
ابوزويد قام يرفع شعاره
وابن شريم اللي مشى في قطاره
اللي بحرف الكاف سارت سراياه
مثل بركات اللي على الكاف شده
نصح(ن)بتجريب الزمان استمده
والدسم نصحه صوب الاخوان رده
غير الشوارد فيها الامثال حلواه
والا البرازي في غرايس منيره
يسمع لشيخن بالجبل بان خيره
واعطاه شارات الزمان الخطيره
وشافه وقال ابيات شعرن عجيباه
ويانجد من سماك نجد غوى اسماك
واللي على الرجلين ماهو ولا اياك
فهد وطى منها مشاويل الاشواك
ابن صليبيخ الذي ذاق مكواه
والاشقر البيطار نافح عن الدار
والسبع عمره ماولد تيس وجفار
واسكت فهد ياناس في زين الاشعار
لكن قصايدهم كما المسك طرياه
ومثله شكى من قال شابت لحانا
شابت وحنا ما لحقنا هوانا
وفقر القرايا في نعاله وطانا
رجل(ن)من الاسياح يشكي بدنياه
اما الغزل باللي جماله مليحي
هذي لمحسن قافها والوضيحي
وابن سبيل جاب وصف(ن)صحيحي
لام العيون اللي تقل وصف ساعاه
وساكر نظم قاف(ن)لعن فيه قطاش
يزعل على ما لون ويرضى على ماش
وعقبه دعى له دعوة(ن)تقل رشاش
باللي ذبح ناس(ن)تقيم الصلواه
ايضا وصوفه للذلول الاصيله
وابوزويد له وصوف جميله
لاشك عايد صعب تسمع مثيله
في وصف زينات الركاب الاصيلاه
وابن دويرج جاب قاف(ن)طويلي
في وصف ريمن رمش عينه ظليلي
اللي رمتني بالمحبه عليلي
مثل الذي قبلي تعرض للآفاه
اللي وقع من رمش خاضب كفوفه
ولاجل المحبه طاح يشكي حتوفه
مثل الدجيما والمطوع حسوفه
ومخلد نخى وادرك حبيبه بلاماه
واللي لبس من شدة الوجد خيشه
باسباب ريمن طاح من قصف جيشه
وطاحت حياته بالمحبه غشيشه
محمد العمار لا حل طرياه
واللي لاجل خله شرب كاس الامرار
ونخى منير وصاح في زين الاشعار
ويامنير ماجاء لك عن الترف ذكار
وذبح غريمه وانتحر عقب بلواه
وثلاث الاخوه من عيال الجلاعيد
واحد ورى الثاني يموتوا مشاريد
باسباب زين العين والردف والجيد
وام الثلاثه بالحشى نار شكواه
واللي شكى همه لورق(ن)تنوحي
يقول روحي كن روحي تروحي
ابراهيم بن كنعان قلبه يفوحي
ناظر شريفه والمرض قام ياطاه
وجتنا علوم رجال طاحوا ضحايا
ولا طاح بـدروب المحبه صبايا
باسباب ضعف البنت بين البرايا
ترضى وكل عهود الاحباب تنساه
واكثر فحول الشعر لاهل القصيمي
جابت رجال(ن)شعرهم بالصميمي
في وقتهم بالشعر ما له لطيمي
وثلاثة(ن)منهم لحايل خذيناه
اول كسايبنا خذينا السنيدي
اللي بجيرتنا وطيبه سعيدي
يقول حايل هي هنايا وعيدي
وحنا من صنوف الحبابه عطيناه
والاشقر اللي ساكن(ن)في حشانا
اللي بقيفان الحميه كفانا
الشاعر اللي بالموده شرانا
وحنا على درب المحبه شريناه
ومحمد العوني شديد النخاوي
اللي كما ذيب(ن)على الجال عاوي
قصايد(ن)تشعل قوي الهقاوي
وصارت سبب سجنه وحزنه وبلواه
وفي قرننا الرابع عشر يالاكارم
جيل(ن)حوى عـدة فحول(ن)صوارم
وهو عندنا نسميه جيل الخضارم
واشعارهم في سهل الالفاظ تلقاه
مثل السديري مع رشيد الزلامي
ومحمد الديري رفيع المقامي
والا الازيمع في لذيذ الكلامي
مع زبن ولد عمير مابه مراواه
وقصايد(ن)شاعت لصقر النصافي
وبدر الحويفي بالقنص غير خافي
والا التبانا قاطعين الفيافي
والخس مع عادي وابن عون ناجاه
والا الفيحاني بالقصيد الثميني
اللي كسى قافه بعقل(ن)رصيني
خالد جمع بالقاف دنيا وديني
يشبه قصيد العود مطلع ومنهاه
والجيل هذا جيل بندر وكادي
اللي شهد له حضرها والبوادي
ابن سرور اللي وطى كل وادي
في وصف زينات المواتر وطرياه
وقصايد النسوان حرفه نشيطي
مثل الدقيس وحبها للسويطي
ومثله مويضي ثم بنت السليطي
ندمت على اللي طاعها في وصاياه
وظويهره قافه سبايب حروبه
بنت الشراري للرجال مهيوبه
ومويضي العجمان قافه عجوبه
وجديع لاجل الشعر ياناس خلاه
والشبرميه حذرت ربعه الذل
جابت كلام(ن) كالرصاص ابهر الكل
وبعذر السحاب اليا ترزم ولا هل
وفكوا دخيل البيت حوض المنياه
مع نورة الهوشان شافت قليبه
واللي نبي عيا البخت لايجيبه
صارت مثل للي عسير(ن)حبيبه
من جملة امثال الرجال الشهيراه
والا الذي يشرح همومه والاسباب
وقال ان هذا هو بلى ابوك ياعقاب
قاله نمر واليوم في كل الابواب
مايوم يمضي كود نسمع بطرياه
مثل الذي يرجي وليه نوايله
اللي رزق داب(ن)عمى من فضايله
لا طالعت برق(ن)ولا هي مخايله
وحجرف خذى منها دلايل وعبراه
وراع الغلط يلقى الشماته من القوم
ومن طاوع الثنتين يصبر على اللوم
النفس والحرمه تخليك مهموم
مع عبد ابن هذال والركب خلاه
ومثل الذي ينذر قضاة القبايل
لا صار ميزانه عن الحق مايل
وقاضي السماء يعلم جميع الفعايل
والشيخ جاسم قال الاعمال يلقاه
وتقول للي حط للكذب تمثال
يظلم كرام النفس ماضين الافعال
والقد ما لانت عراويه بتفال
حكمه لابن لعبون مع شخص هاجاه
ويقول للي طاح والخير فاته
واصبح قريبن ياعرب من وفاته
محدن يسد السيل عنك بعباته
وبعض البلاوي ماترده بفزعاه
وتقول للي بالشرابيك بلشان
اضرب على الكايد اليا صرت بحلان
وعيبن على اللي يختفي عقب مابان
لابن رشيد عبيد يخبر رعاياه
ومثله على المعنى اذا كنت داري
والعمر ماياقاه كثر المداري
عن مقعد(ن)تصبح من العز عاري
هذي لتركي شيخ نجد(ن)ومركاه
واللي يدوهج بالسهل مع جروفه
من دون حاجه تفرضه له ظروفه
ومشيك بلاحاجه تره قل شوفه
ابوحمد قاله على حسب روياه
والصدق يظهر لك على كل الاحوال
وماضاع وقت الصوم يظهر بشوال
والناس تدري بالجدايد والاسمال
لابوطلال الشيخ في شرح بلواه
واضرب ولدك ان كنت تبغيه يشفيك
ولو زعلت امه لاتخليه ياليك
وتيس(ن)يحطه وال الاقدار بيديك
بركات قاله في مثاني وصاياه
ومن كدر الصافي شرب من زلاله
والدار تحمي بالشواطير جاله
وان كان ماتدرى عواقب رجاله
قال الوبير البنت يكشف مغطاه
واللي يباعد عن دروب الهواني
ولا ياخذ الحاجه عقب شخص ثاني
ولايشرب القفوات كود الهداني
لراكان بن حثلين قافه وحلياه
وهو قال قول(ن)للاوادم ذخيره
والهرج يغني صامله عن كثيره
عن عالم(ن)بالهرج يكثر هذيره
وياشين هرج(ن)زايد(ن)غاب معناه
واللي يفكر بالوقوت الخوالي
وانته تشوف الهرج ماله مجالي
تقول له ياهيه ياهملالي
قاله جديع الشهم في وصف دنياه
واذا نصحنا اللي برايه عصانا
نقول له لاشاف صادق هوانا
انته تقول هنا وانا اقول هانا
في قاف ابن سراح والجوف مرباه
والناس بالهمه وصوفه بعادي
والحر الاشقر لا لقى الجول صادي
والتبع يفلس من عمود الجرادي
هذي لابن خربوش راع الجزيلاه
واللي لقى عند الجماعات غيضه
من عالم(ن)صارت قلوبه مريضه
شمس الخيار ولا ظلال الفريضه
هذا المزيني بالبيوت الثميناه
واللي يبي يسلم من الناس كله
مدام قرب الناس للقلب عله
ولا جنبك شر المخاليق خله
قضيب قاله والقصيده ذكرناه
واللي يشوف الناس تحتاج توضيح
والطيب كل(ن)نال من هبة الريح
قسم(ن)وهو بين الوجيه المفاليح
العنقري قاله لبنت(ن)تهزاه
وعبيد عاش وشاف جور الليالي
الاسعدي راع البيوت الجزالي
والعود يوم انه يجيب العيالي
يبي بتال العمر لذه وطرباه
والا الدقيس ونصحها للرفاقه
ولا تستخيل البرق لو هو شفاقه
ومن لا يودك نور عينك فراقه
بيتين تسوى له قصايد وقافاه
والثالثه تسليم رب السريره
ويالله عسى ماتكره النفس خيره
للي جعل رب البرايا ذخيره
سبحان رب العرش رب السماواه
وابوجري زين المثل داج سوقه
والعوشزه ماينزل الطير فوقه
ولا به مقيل لواحدن بان ذوقه
هذا الجنوبي صاغها في وصاياه
او راضي القصاد جاب النصايح
يقول شاور من يحوز المدايح
واترك كلام اهل الردى والفضايح
ومن شاور البايه على قالته باه
واللي درس زين المثايل دراسه
وراع الجحش يلبس مع الدرع طاسه
بوقتن به الحصني يدور الفراسه
ابو زويد جابها طاب ذكراه
والثالثه قاله يحذر رجاله
اللي تهين النفس ترجي رياله
تر ربع يومن مقعدك بالشكاله
تسوى حياة العفن وسط المهوناه
واللي يهدد واحدن بالنكادي
من عقب صبر(ن)مثل صبر المهادي
قال الوعد لاسال بالغيث وادي
هذا اللميع يهدد اللي تحداه
وثوب المعزه لاغدى فيك ضافي
تقول باقي عمرنا للذلافي
واليا حصل عز(ن)مع الكيف كافي
زيد الخوير وقال مابه حسافاه
واللي يسير بدرب ماهو وكادي
يظن فعله بالعرب فعل عادي
ويغويه عن نقل الصميل البرادي
وابن سبيل قال للناس شوفاه
وان جيت تنصح واحدن مال شيله
وتبيه يفزع للسيوف الصقيله
والحق ظلماء والمصقل دليله
لظويهره تشكي طبوع السبيلاه
واللي نشد يبي الكرم والوقاره
تعطي وصوف الرجم في راس قاره
مار البلى دونه جحور وخباره
هذا الرويلي ينذر اهل الردياه
وراشد يقول الثوب لو كان خيشه
او عاش عمره ساكن(ن)في عريشه
شربه قراح الماء مع الناس عيشه
لاصار مكفي الهموم الشديداه
وان صار فيه امرن يجي منه مثلام
وتبي العرب تسرع مع الطير لا حام
شي يفوت البارحه كنه العام
ردهان قاله واخمد الحرب واطفاه
واللي نخى بالطيب يبي الرفاقه
يبي الفزع للقلب حيثه شفاقه
وما من ورى عوج النصايب صداقه
يقوله الهربيد وجريس شاكاه
ومن لازم المشراق فوق الوسايد
يموت ماحاشت يديه الفوايد
ومن طاب ينخى في وقوت الشدايد
هذا الخلاوي زين قافه ومعناه
واللي خذى زين المثل دايمن فن
وحصان طيبه بالملازيم ما كن
واعرف ترى سن اللبن يقلعه سن
لمحمد بن سعود والزين يزهاه
وياحيف وان الحيف مايقري الضيف
من لابة(ن) لاغبت عنهم مواليف
وان جيت مجلسهم تجندت بالسيف
لسمير بن زيدان شيخن عرفناه
وكان القرابه في غثى البال هانوك
تقلط على البارد وتنزح عن احوك
ولا ينكره بعد الرفاقه اليا اوذوك
يقوله النوري لنقوة دناياه
واللي مشى بالراي عكس المسارا
ماينفعه شور العرب والنصارا
واللي يضيع الليل يرجي نهارا
ومن ضاع وقت الظهر ضاعت حلاياه
وابالشيوخ افعال غيره حمدها
خلف اليا جاء الخيل يقطع جهدها
والطيب واجد مير هذي وحدها
يمدح رجال(ن)طيبهم طال مبناه
والله نشد ياحمود عن معرفة يوم
الاحمدي قاله لاجل يترك الدوم
وياحمود يظهر لك صديقن من القوم
وتاتيك من بعض القرابات غاراه
واللي تسبب في شباك(ن)تصيده
ومن فعل كفه ذاق همه وكيده
وكم لحية(ن)جاها خراها من ايده
بنت السليطي قالته عقب بلواه
واللي تغرب عن دياره وريفه
والطير بالجنحان محلا رفيفه
ويمنى بلا يسرى تراها ضعيفه
هذي لابن روسان عقب القراباه
واللي عطى غيره من الغانميني
ولا يستعيده في قساوه وليني
وحنا عطيتنا عطية غبيني
لهايس من المجلاد وذياب راكاه
ومن قال انا البلوى يلاقي بلاوي
ويصير باقواله من الربح خاوي
وقت الهلالات الذي صار هاوي
وبعض الرواة لساجر الطيب ينصاه
واللي بصدره حاجة ماهرجها
ضايق ويرجي من وليه فرجها
نقول رجلك بالوسيعات سجها
قول السديري للذي عاف دنياه
ويقول تر ظلم القرابات حساس
وكان انهم كانوا سبب كل هوجاس
مالك مشاريهن على نايد الناس
للي ربوعه دايم الدوم تشناه
واللي يسولف في مجالس هملها
لو هي هروجن مثل ريحة نفلها
تسمج اليا عرضت على غير اهلها
في شعر قحطان الجليله سمعناه
واللي يذوق الجور والوقت واطيه
يبي لطيف القلب عن شوف قاسيه
حيثه ليان ومن لقى اللين يتليه
يقوله الهجلي لشيخن ترضاه
وحسد العرب مسبوك في ضامره سبك
وان شاف طيبك بين الاقوام حاربك
لافاعلن فعلك ولاهـو مجنبك
هذا الزلامي يخبرك كيف دعواه
سوالف(ن)للطيب صارت دلايل
وفيها لصدق الهرج قول وفعايل
والصدق واضح ندعمه بالمثايل
من راوي(ن)في مصنع الذهن نقاه
جاب المثايل في جميلات الالحان
اللي يناديه العرب يابن غسلان
والله فلا توزن حروفه بالاثمان
ومن يبذل المعروف له يوم يلقاه
ذكرى لمن ينشر دروب المراجل
وقاسى طعونن موجعات(ن)عواجل
من فوق طعنات العيون النواجل
من رمش ريم(ن)عذبه يوم راعاه
موضوعنا يمكن يصير الاخيري
مادام مالي بالخلايق نصيري
الطيب طيبي والكرامه لغيري
وان طحت محدن قال يالربع ويلاه
ان طاب غيري ثاروا الربع تصفيق
وان طبت انا تسكت جميع المخاليق
وانا ادري انه غيرة ام المخانيق
وزادو عليها لاجلنا عشر غيراه
ياما وقعت بوسط ربعي مريضي
ومن طحت عنده ثار مثل العضيضي
وان كان قلبي في حياته حضيضي
اكفخ كما طير(ن)عجاجه تقفاه
ياسرعهم ياناس في نشر عيبي
زود(ن)على جحدان جهدي وطيبي
ما كني الا للجماعه حريبي
عزاه من حالي مع الربع عزاه
اصبحت كني للمخاليق شمعه
توضي وترسل من لظى النار دمعه
ومحدن رمع جرح المعاليق رمعه
وحنا اليا ضاق الرفاقه رمعناه
اربعمائة بيت(ن) بكل القوافي
من ضامر(ن)قافه عزيز(ن)وصافي
وعليه ثوب(ن)باللوازيم ضافي
ووسط الجبل تبقى مدى الدهر ذكراه
والحمد لله عد ما لاح بارق
واعداد نور(ن)من لظى الشمس شارق
من خافقن تكويه نار المطارق
ورقى جبال الصدق ما هاب مرقاه
تحيتي :)